ការថែទាំផលិតផលពីស្បែកសត្វធម្មជាតិ

ស្បែកជាវត្ថុធាតុដើមសម្រាប់ផលិតជាសម្ភារៈប្រើប្រាស់ផ្សេងៗ ដែល​មិន​គ្រាន់​តែ​ផ្ដល់​នូវ​ភាព​ស្រស់​ស្អាត​ប៉ុណ្ណោះ​ទេ វា​ថែម​ទាំង​ផ្ដល់​ឲ្យ​នូវ​ភាព​ប្រណីត​ដល់​សម្ភារៈ​ទាំង​អស់​នោះ ព្រម​ទាំង​ផ្ដល់​នូវ​អារម្មណ៍​ល្អ​ក្នុង​ការ​ប្រើប្រាស់។ ស្បែក​ដែល​មាន​គុណភាព​ល្អ ជា​ស្បែក​ដែល​យក​ពី​រាងកាយ​របស់​សត្វ ហើយ​វា​មានភាព​ធន់ និង ប្រើប្រាស់​បាន​យូរ​អង្វែង។ លក្ខណៈសម្បត្តិ​ទាំង​អស់​នេះ​ហើយ​ដែល​ធ្វើ​ឲ្យ ស្បែក មាន​តម្លៃ​ខ្ពស់ ហើយ​ផលិតផល​ធ្វើ​អំពី​ស្បែក គឺ​មាន​តម្លៃ​កាន់​តែ​ខ្ពស់​ថែម​ទៀត។ ដូច្នេះ​ហើយ លោក​អ្នក​ច្បាស់​ជា​ចង់​ថែ​ទាំ​ផលិតផល​ស្បែក​របស់​លោក​អ្នក​ឲ្យ​នៅ​គង់វង្ស​បាន​យូរ​អង្វែង។ ពិត​មែន​ឬ​ទេ?

លោក​អ្នក​អាច​ធ្វើ​ការ​ថែ​ទាំ​ផលិតផល​ស្បែក​របស់​លោក​អ្នក​ដោយ​ខ្លួន​ឯង​តាម​កាលៈទេសៈ និង វិធីសាស្ត្រ​ដូច​ខាង​ក្រោម ៖

 

 

ការថែទាំធម្មតា

ស្បែក គឺជាវត្ថុធាតុដើមដែលពីធម្មជាតិ។ ពេលប្រើប្រាស់ផលិតផលដែលធ្វើអំពីស្បែក (ស្បែកសត្វ) លោកអ្នកត្រូវចៀសវាងពីការដែលឲ្យវាប៉ះត្រូវផ្ទាល់ជាមួយទឹក ឬ សារធាតុដែលមានជាតិអាស៊ីដ។ នៅពេលដែលលោកអ្នកធ្វើតំហែទាំផលិតផលស្បែក ដំបូងបំផុតលោកអ្នកត្រូវសម្អាតធូលីដែលជាប់នឹងផ្ទៃខាងលើជាមុនសិន រួចទើបធ្វើការជូតសម្អាតថ្នមៗ ដោយប្រើប្រាស់សំឡីដែលជ្រលក់ប្រេងសម្រាប់សម្អាតផលិតផលស្បែក ដែលត្រូវជាមួយនឹងពណ៌របស់ស្បែក។ រួចហើយលោកអ្នកអាចទុកដាក់វានៅក្នុងថង់ក្រណាត់ និង រក្សាទុកនៅកន្លែងត្រជាក់ ស្ងួត និង មានខ្យល់ចេញចូល។

 

ដំណោះស្រាយបញ្ហាឆ្កូត និង កកិត

ប្រើប្រេងសម្រាប់សម្អាតផលិតផលស្បែកលាបផ្ទៃខាងលើនៃស្បែក ជាពិសេសតំបន់ដែលមានការខូចខាត រួចហើយជូតឈ្លីទៅវិញទៅមកៗ។ ចុងបញ្ចប់ ប្រើសំឡីស្ងួតដើម្បីខាត់លើផ្ទៃស្បែកដើម្បីឲ្យភ្លឺរលោង។

 

ដំណោះស្រាយបញ្ហាត្រូវទឹក

ធ្វើការសម្ងួតជាតិទឹក ឬ សំណើមដោយប្រើសំឡីស្ងួត ហើយយកផលិតផលស្បែកនោះទៅទុកនៅកន្លែងត្រជាក់ដើម្បីហាលខ្យល់ឲ្យស្ងួតតាមសម្រួល រួចហើយទើបជូតសម្អាតតាមក្រោយ។ លោកអ្នកមិនត្រូវសម្ងួតវាដោយប្រើម៉ាស៊ីនផ្លុំសក់ ឬ ដាក់ហាលថ្ងៃដើម្បីឲ្យឆាប់ស្ងួតភ្លាមៗនោះទេ។ ស្ថិតនៅក្រោមសីតុណ្ហភាពខ្ពស់បែបនោះ វានឹងបណ្ដាលឲ្យផលិតផលស្បែករួញ ប្រេះ និង ខូចទ្រង់ទ្រាយ។

 

ដំណោះស្រាយបញ្ហាដុះផ្សិត

ដុសសម្អាតកម្អែលផ្សិតចេញពីផ្ទៃស្បែក រួចជូតសម្អាតថ្នមៗជាមួយសំឡីសើម បន្ទាប់មកទុកផលិតផលស្បែកនោះនៅកន្លែងត្រជាក់ និង មានខ្យល់ចេញចូល ដើម្បីបំបាត់ក្លិនផ្អូម ឬ ក្លិនមិនល្អ។ ចុងបញ្ចប់ ប្រើប្រេងសម្រាប់សម្អាតផលិតផលស្បែកមកជូតសម្អាតមុននឹងប្រើប្រាស់។

Leave a comment