គន្លឹះបែងប្រាក់ចំណូលជា៥ចំណែករបស់មហាសេដ្ឋី Li Ka-Shing ដើម្បីក្លាយជាអ្នកមានក្នុងពេលដ៏ខ្លី
មិត្តអ្នកអានប្រហែលជាធ្លាប់ស្គាល់លោក Li Ka-Shing ជាមហាសេដ្ឋីប្រាក់ច្រើនជាងគេបំផុតរបស់អាស៊ីមកពីទីក្រុងហុងកុងដែលត្រូវបានគេចាត់ទុកថា ជាអ្នកជំនួញដ៏មានសក្ដានុពលនៅពេលបច្ចុប្បន្ន។ នេះក៏ដោយព្រោះការខិតខំប្រឹងប្រែងរបស់លោកដែលបានរើបំរាស់ខ្លួនពីកម្មករក្រីក្រស៊ីឈ្នួលគេ ទៅជាប្រធានក្រុមហ៊ុនធំៗរហូតមានប្រាក់ ៣០ពាន់លានដុល្លារនៅក្នុងដៃ។
ដោយសារតែឃើញពីសក្ដានុពលរបស់លោកយ៉ាងនេះហើយ ទើប ISMART លើកយកគន្លឹះមួយដែលមហាសេដ្ឋីរូបនេះយកមកប្រើប្រាស់ដើម្បីក្លាយខ្លួនជាអ្នកមានក្នុងរយៈពេលដ៏ខ្លី។ នោះគឺគន្លឹះគ្រប់គ្រងប្រាក់ចំណូលរបស់ខ្លួន។
លោក លីកាស៊ីង មានប្រសាសន៍ថា មិនសំខាន់ថា អ្នកអាចរកលុយបានប៉ុន្មាននោះទេ តែសំខាន់ត្រង់ថា អ្នកគ្រប់គ្រងវាដោយរបៀបណា។ ខាងក្រោមនេះជាយុទ្ធសាស្ត្របែងចែកប្រាក់ចំណូលរបស់លោក លីកាស៊ីង។
ឧបមាថា អ្នកមានប្រាក់ខែ ៤០០ដុល្លារក្នុងមួយខែ អ្នកត្រូវបែងចែកប្រាក់នោះជា៥ចំណែកគឺចំណែកទី១ ស្មើនឹង ១២០ (៣០%) ចំណែកទី២ ស្មើនឹង ៨០ដុល្លារ (២០%) ចំណែកទី៣ ស្មើនឹង ៦០ដុល្លារ(១៥%) ចំណែកទី៤ ស្មើនឹង ៤០ដុល្លារ (១០%) និងចំណែកទី៥ ស្មើនឹង ១០០ដុល្លារ (២៥%)។
១) ចំណាយ ១២០ដុល្លារសម្រាប់ការហូបចុក
លោកលីកាស៊ីងបាននិយាយថា អ្នកត្រូវចែកប្រាក់ ១២០ដុល្លារសម្រាប់ការហូបចុកប្រចាំថ្ងៃ។ សម្រាប់អាហារពេលព្រឹកអ្នកមិនត្រូវចំណាយខ្ជះខ្ជាយច្រើនពេកនោះឡើយ ពោលគឺអាចអាចហូបមី ពងទា និងទឹកដោះគោមួយកែវជាការស្រេច។ សម្រាប់អាហារអាហារថ្ងៃត្រង់ អ្នកអាចហូបអាហារណាដែលឆ្អិតស្រាប់ និងផ្លែឈឺមួយចំនួនទៀត។ រីឯអាហារពេលល្ងាចវិញ អ្នកត្រូវចម្អិនអាហារដោយខ្លួនឯងដែលមានបន្លែចំនួនពីរចាន និង ពិសារទឹកដោះគោមួយកែវមុនពេលចូលគេង។
២) ចំណាយ ៨០ ដុល្លារសម្រាប់បង្កើនការទំនាក់ទំនង
លោក លីកាស៊ីងណែនាំថា អ្នកអាចចំណាយលុយ៨០ ដុល្លារ នេះសម្រាប់ទិញកាតទូរស័ព្ទ និង ជួយចេញថ្លៃអាហារម្តងកាលជាមួយមិត្តភក្ដិរបស់អ្នក។ តែត្រូវចាំថា មិត្តភក្ដិដែលអ្នករាប់អាន និងចេញថ្លៃអាហារឲ្យត្រូវប្រាកដថា ជាមនុស្សមានចំណេះដឹងខ្ពស់ជាងអ្នក មានជាងអ្នក ឬ ជាមនុស្សដែលអាចជួយត្រួសត្រាយផ្លូវអ្នកឲ្យជោគជ័យក្នុងអាជីពការងារបាន។ លោកបានពន្យល់ថា អ្នកនឹងឃើញលទ្ធផលរបស់ខ្លួនក្នុងកម្រិតណាបន្ទាប់ពីមានទំនាក់ទំនងជាមួយមនុស្សប្រភេទនេះក្នុងរយៈពេលមួយឆ្នាំក្រោយមក។
៣) ចំណាយ៦០ដុល្លារសម្រាប់បង្កើនចំណេះដឹង
អ្នកអាចចំណាយប្រាក់ខែរបស់អ្នកពី១០ទៅ១៥ដុល្លារសម្រាប់ទិញសៀវភៅល្អទុកសម្រាប់អានជាប្រចាំ។ មហាសេដ្ឋីរូបនេះបានបញ្ជាក់ថា ព្រោះតែអ្នកគ្មានលុយច្រើនដូចគេ ដូច្នេះហើយអ្នកត្រូវតែខិតខំសិក្សារៀនសូត្រឲ្យបានច្រើនកាន់តែល្អ។ អ្នកត្រូវអានខ្លឹមសារសៀវភៅដែលអ្នកទិញឲ្យបានប្រុងប្រយ័ត្ន និងច្បាស់លាស់ ព្រមទាំងរៀនពីយុទ្ធសាស្ត្រផ្សេងៗពីសៀវភៅនោះ។ ទន្ទឹមនឹងគ្នានេះ ទឹកប្រាក់ដែលនៅសល់ពីការចំណាយនេះត្រូវចំណាយលើការសិក្សាវគ្គខ្លីៗផ្សេងទៀតលើជំនាញវិជ្ជាជីវៈរបស់ខ្លួននៅតាមសាលា ឬ គ្រឹះស្ថានសិក្សានានា សម្រាប់បង្កើតចំណេះដឹងរបស់អ្នក។
៤) ចំណាយ៤០ដុល្លារសម្រាប់ទេសចរណ៍
ការលំហែកាយធ្វើដំណើរទេសចរណ៍ទៅកាន់តំបន់ផ្សេងៗនឹងជួយឲ្យអ្នកមានអារម្មណ៍ស្រស់ស្រាយ ហើយអ្នកត្រូវធ្វើយ៉ាងហោចណាស់ម្តងក្នុងមួយឆ្នាំ។ អ្នកត្រូវដកស្រង់បទពិសោធន៍នានាដែលទទួលបានពីទស្សនាចរណ៍របស់អ្នក ដើម្បីបង្កើនការយល់ដឹងបរិបទជាច្រើននៅក្នុងសង្គម។
៥) ចំណាយ ១០០ដុល្លារសម្រាប់ការវិនិយោគ
លោក លីកាស៊ីង បានផ្តល់យោបល់ថា អ្នកត្រូវទុកប្រាក់របស់អ្នកប្រចាំខែឲ្យបាន១០០ដុល្លារក្នុងមួយខែនៅក្នុងធនាគារ ដើម្បីទុកធ្វើជាដើមទុនបង្កើតអាជីវកម្មតូចមួយនៅពេលខាងមុខ។ អាជីវកម្មដ៏តូចនេះមិនមានហានិភ័យខ្ពស់ឡើយ ហើយអ្នកក៏មិនមានការខាតបង់ច្រើននោះដែរក្នុងករណីវាមិនអាចដើររលូនទៅមុខបាន។
ទោះបីជាយ៉ាងណាក៏ដោយ អាជីវកម្មដ៏តូចនេះនឹងជំរុញឲ្យអ្នកមានទំនុកចិត្ត និងកម្លាំងចិត្តកាន់តែខ្លាំងឡើង ទន្ទឹមនឹងមានបទពិសោធន៍កាន់តែរឹងមាំក្នុងអាជីវកម្មរបស់អ្នកអាចពង្រីកខ្លួនកាន់តែធំឡើងនៅពេលអនាគត។ អ្នករកប្រាក់បានកាន់តែច្រើនមានដើមទុនកាន់តែធំក្នុងគោលដៅវិនិយោគរយៈពេលវែង ហើយអ្នកនឹងមានសុវត្ថិភាពហិរញ្ញវត្ថុក្លាយជាអ្នកមានបន្តិចប្តងៗដោយមិនដឹងខ្លួន
1 comment
Well done! Rith, you did great job!